ဂျပန် စက္ကူ လေယာဉ် ပြိုင်ပွဲတွင် မောင်သောင်ဒီ တတိယဆုရရှိ်
ဆုယူအပြီး တွေ့ရသော မောင်သောင်ဒီ (ဓာတ်ပုံ - အေပီ)
အသက် ၁၂နှစ် ကလေးများ ပါဝင်ယှဉ်ပြိုင်ရသည့် ပြိုင်ပွဲတွင် မောင်သောင်ဒီ၏ စက္ကူလေယာဉ်သည် ၁၀.၅၃ စက္ကန့်ကြာ လေပေါ်တွင် ပျံဝဲနိုင်ခဲ့ပြီး တတိယဆု ရရှိခဲ့ခြင်း ဖြစ်သည်။ အဆိုပါ ပြိုင်ပွဲတွင် ပထမဆုကို ဂျပန်ကလေးငယ် တဦးက ဆွတ်ခူးရရှိခဲ့ကြောင်း သိရသည်။
မောင်သောင်ဒီနှင့် တခြားအဖွဲ့ဝင် ၂ ဦးတို့ ပါဝင်သည့် အဖွဲ့လိုက် ယှဉ်ပြိုင်ရသော ပြိုင်ပွဲတွင် မောင်သောင်ဒီ၏ လေယာဉ်က ၁၁ စက္ကန့်ကြာ လေတွင်ဝဲပျံနိုင်ခဲ့ပြီး ပထမဆု ရရှိခဲ့သည်။
မောင်သောင်ဒီ ဖခင်ဖြစ်သူ စိုင်းညွှန်က“ ထိုင်းနိုင်ငံ ကိုယ်စားပြုပြီးတော့ တတိယဆုယူပေးလိုက်လို့ ကျနော် အရမ်းပျော်တယ်၊ ဂုဏ်လဲယူတယ်၊ သူဟာ တခြားကလေးတွေ အတွက် အတုယူစရာ ကလေး တယောက် ဖြစ်သွား ပါပြီ” ဟု ဧရာဝတီသို့ ပြောသည်။
ယခုအချိန်တွင် ထိုင်းသတင်းဌာနတခုက မိသားစုအားလုံးကို ဘန်ကောက်သို့ ပို့ဆောင်ပေးမည်ဟု ဆိုသဖြင့် သွားရောက်ရန် ကားစောင့်ဆိုင်းနေကြောင်း၊ ဘန်ကောက်တွင် မောင်သောင်ဒီအား ဂုဏ်ပြုပွဲများ ပြုလုပ်ပေးမည် ဟုလည်း ကြားသိရကြောင်း၊ မောင်သောင်ဒီသည် ယနေ့တွင် ဂျပန်နိုင်ငံမှ ပြန်လည်ရောက်ရှိမည် ဖြစ်ကြောင်း ၎င်းက ဆက်လက် ပြောဆိုသည်။
မောင်သောင်ဒီသည် ထိုင်း နိုင်ငံခြားရေး ၀န်ကြီး ဌာနက စက်တင်ဘာလ ၄ရက်နေ့တွင် ထုတ်ပေးခဲ့သည့် အ၀ါရောင် ယာယီ နိုင်ငံကူးလတ်မှတ်ဖြင့် ဂျပန်နိုင်ငံသို့ သွားရောက်ခဲ့ခြင်း ဖြစ်သည်။
ဂျပန်သို့ မထွက်ခွာမီ လွှတ်တော်အဆောက်အဦးတွင် ထိုင်းဝန်ကြီးချုပ် အဖိဆစ် ဝေ့ချာချီဝက မောင်သောင်ဒီ ကို တွေ့ဆုံ၍ အားပေးစကား ပြောကြားခဲ့သည်။
စက္ကူခေါက် လေယာဉ်ပျံ ပြုလုပ်ရာတွင် ကျွမ်းကျင်သည့် မောင်သောင်ဒီသည် ယမန်နှစ်က ဘန်ကောက်တွင် ပြုလုပ်သည့် ပြိုင်ပွဲတခုသို့ သွားရောက်ယှဉ်ပြိုင်ရာ သူ၏ စက္ကူခေါက် လေယာဉ်က ၁၂ . ၅၀ စက္ကန့်ကြာ လေတွင် ပျံဝဲနိုင်ခဲ့သည်အထိ စွမ်းရည်ပြသခဲ့သည်။
