သူလိုကိုယ်လိုကောင်

မျိုးမြင့်ချို

Tuesday, June 16, 2009

်

“သူလိုကိုယ်လိုကောင်”

ဘဝမှာ
ပြောစရာ
များများစားစားမရှိပါဘူး

သူလိုကိုယ်လို
ထောင်လေးဘာလေးကျဖူးတယ်
သူလိုကိုယ်လို
တော်လှန်ရေး ဘာညာပြောတယ်

သူလိုကိုယ်လို
လက်မထောင်တယ်
သူလိုကိုယ်လို
နိမ့်ရာကို လှံစိုက်တယ်

သူလိုကိုယ်လို
ဟင်းဖတ်လည်း ပါပါပေးတယ်
သူလိုကိုယ်လို
ပါးလည်းပြောင်တယ်

သူလိုကိုယ်လို
ပျော့ညံ့တယ် ပျော့ပျောင်းတယ်
သူလိုကိုယ်လို
တည်ငြိမ်တယ် တွေဝေတယ်

သူလိုကိုယ်လို
ကာလာမသုတ္တံနဲ့ ဝိဘဇ္ဇဝါဒကိုကိုက်တယ်
သူလိုကိုယ်လို
ဥခွံဟောင်းနဲ့ ကလီရှေးကို နှစ်ခြိုက်တယ်

သူလိုကိုယ်လို
ပိယေဟ ဝိပယောဂေါ ဒုက္ခော
သူလိုကိုယ်လို
အပိယေဟိ သံမယုတ္တကော ဒုက္ခော

သူလိုကိုယ်လို
သူလိုကိုယ်လိုနဲ့
သူလိုကိုယ်လိုတွေချည်းပါပဲ

ဒါပေမယ့်
မင်းသားခေါင်း မဆောင်းဖူးဘူး
ဧည့်ခန်းဆောင်မှာ
ယဉ်ကျေးယောင် မဆောင်ဖူးဘူး
မယုံတာကို ယုံတယ်လို့
ယုံတာကို မယုံဘူးလို့ မပြောဖူးဘူး

အသေချာဆုံးကတော့
ရန်သူစစ်စစ်နဲ့
မိတ်ဆွေစစ်စစ်ကိုရှာရင်း
ဆင်းရဲတွင်းကို မရှောင်ဖူးဘူး

အင်း…
ပြောရင်း ပြောရင်းနဲ့
သူလိုကိုယ်လို
သူလိုကိုယ်လိုနဲ့
သူလိုကိုယ်လိုကောင်
မောင်းတင်လိုက်ပြန်ပေါ့

မျိုးမြင့်ချို